Ao longo de xaneiro de 2019, preto de 90 expertos de distintos sectores participaron nas mesas de traballo organizadas baixo o marco do proxecto Galicia 2030. Estas mesas teñen o obxectivo de profundar na definición e caracterización dos roles profesionais de futuro.
As mesas sectoriais que se celebraron ao longo destas semanas son: agroalimentación, saúde e benestar social, xestión de residuos e ciclo da auga, biotecnoloxía, madeira, servizos profesionais, mar e industria, enerxía e naval. Nelas participaron as principais empresas de cada sector, as súas agrupacións industriais ou organizacións máis representativas, así como pemes e spin-offs caracterizadas pola súa aposta pola innovación.
Durante estas sesións, os expertos debateron sobre os perfís profesionais identificados para cada sector nas anteriores fases do proxecto, que priorizaron segundo o seu impacto a futuro no emprego. A partir de aquí, organizados por grupos, construíron os roles máis relevantes, identificando as principais KETs, competencias técnicas e persoais que lles son de aplicación.
Os asistentes tamén determinaron o escenario de proxeccións de emprego con maior probabilidade de materialización no horizonte 2030.
Este input é de enorme valor para a elaboración do catálogo de perfís profesionais de futuro, un dos principais fitos desta iniciativa e que culminará a primeira fase do proxecto.
O proxecto Galicia 2030, desenvolto por FEUGA e impulsado pola a Conselleria de Educación, Universidade e Formación Profesional, ten como obxectivo adaptar as titulacións e especialidades universitarias ás necesidades e esixencias da sociedade e o mercado laboral dos próximos anos.
